അച്ചടി ഭാഷ

കഥ നടക്കുന്നത് കുറച്ച് കാലം മുൻപ്‌

സ് ഥലം കേരള തമിഴ്‌നാട് ബോർടർ

അവസ്ഥ ആന റോഡിൽ ഇറങ്ങി വണ്ടി മുന്നോട്ട് പോകാൻ വയ്യാണ്ട് സ്റ്റക്ക് ആയി നില്ക്കുന്നു

കഥാപാത്രങ്ങൾ:
കോട്ടയം ലിജോ (കോലി)
ചെറിയ വിഷ്ണു (ചെവി)
വലിയ വിഷ്ണു (വാവ)
ലഹരി സാബു (ലിസ)
ഞാൻ (ഞാൻ)

വണ്ടിക്കകത്ത് പൊരിഞ്ഞ തർക്കം

കോലി: എടാ എന്തൊക്കെ പറഞ്ഞാലും കോട്ടയത്തെ ഫാഷ ഉണ്ടല്ലോ, അതാണ്‌ അച്ചടി ഫാഷ.

ഞാൻ: എന്ത് വെച്ചടി ഭാഷയാ?

കോലി: പ്ഫ!! വെച്ചടി അല്ല, അച്ചടി, അച്ചടി

ചെവി: അളിയാ, അച്ചാറിന്റെ "അച്ച"നും, വെടിയുടെ "ടി"യും

ഞാൻ: അതന്നല്ലേ ഞാനും പറഞ്ഞത്, എനിവേസ് അച്ചാറിന് അച്ഛനുള്ള കാര്യം ഇപ്പഴാണ് ഞാൻ അറിഞ്ഞത്. "I am the sorry"

വാവ: തിരോന്തോരത്തെ ഭാഷക്ക് യെന്തെരെടെയ്‌ ഒരു കുഴപ്പം?

കോലി: ഹോ, എന്തൊരു കൂറ ഫാഷ ആണത്. കേൾക്കുംബോൾ തന്നെ അറപ്പ് തോന്നും. "എന്തര് മൊട?", "അടിച്ച് റൊട്ടി ആക്കും", "കലിപ്പ് തന്നെ?", "വേഷാ കിട്ടിയാ?", "അഴുക്ക പയല്", അസഹനീയം.

ഞാൻ: ബെസ്റ്റ്, അതൊക്കെ മാറ്റി, "എന്തുവാ അഹങ്കാരം", "അടി തന്ന് പത്തിരി പോലെ ആക്കും", "കുഴപ്പം ഉണ്ടാക്കാനാണോ ഫാവം", "നന്നായി അനുഭവിച്ചു അല്ലെ?", "കൊള്ളരുതാത്ത യുവാവ്" എന്നൊക്കെ പറഞ്ഞാൽ നല്ല എഫ്ഫക്റ്റ്‌ ആയിരിക്കും. എണീറ്റ് പോടേയ്.

കീരിക്കാടാൻ ജോസ് അടിക്കാൻ വരുമ്പോ ലാലേട്ടൻ "Hey gunda, Don't fight with me, I am a paavam" എന്ന് പറഞ്ഞാൽ എങ്ങനിരിക്കും, അത് പോലെ ആണ് നിന്റെ അച്ചടി ഫാഷ. അത് ബുക്കിൽ അച്ചടിച്ച്‌ വെക്കാനെ കൊള്ളതുള്ളു, പറഞ്ഞ് തരാൻ വേറെ ആള് വേണം.

കോലി: ഒന്ന് പോടോ, ഇവിടുത്തെ ആള്കാരെ പോലെ തന്നെ ഫാഷയും.

വാവ: പയലേ മിണ്ടാതിരുന്നില്ലേ ഇപ്പൊ പിടിച്ച് ആനക്ക് ഇട്ടു കൊടുക്കും.

ലിസ: അയ്യോ ആന ഇറങ്ങിയോ, ഒരു ഫുൾ ഇനീം ബാക്കി ഇരിപ്പുണ്ട്, ഞാൻ അപ്പഴേ പറഞ്ഞതാ തീർക്കാന്ന്. ഇപ്പൊ എന്തായി. അതടിക്കും മുന്നേ വെല്ലോം ആന എന്ന്നെ തട്ടിയാൽ ഒരുത്തനേം ഞാൻ വെറുതെ വിടില്ല.

ചെവി: അത്രക്ക് ദണ്ണമാണേ നീ പോയി ആ ആനയോട് പറ നിന്നെ മാത്രം കൊല്ലരുതേ എന്ന്.

ലിസ: അയ്യട എന്നിട്ട് വേണം ആ ഗ്യാപ്പിൽ നിനക്കൊക്കെ അതടിച്ച് തീർക്കാൻ.

ഞാൻ തിരിഞ്ഞ് കോലിയെ നോക്കി, അവൻ ടെസ്പ് ആണ്.

ഡാൻസ്‌ കളിക്കാൻ ആവേശത്തോടെ പോയാ ഡാൻസ് കാരീടെ ചെറുവിരൽ മേശയുടെ കാലിൽ തട്ടിയ പോലെ ആയിരുന്നു എന്റെ മറുപടി അവനിൽ പതിച്ചത്.

കൊളപുള്ളി അപ്പന് ജഗന്നാതനോട് തോന്നിയ അതെ വികാരം അവന് എന്നോട് തോന്നിയിട്ടുണ്ടാകാം.

പെട്ടെന്നാണ് ഔര് ജീപ്പ് നമ്മളെ ഒവർട്ടേക്ക് ചെയ്ത് പോയത്

ആൾ-റെടി, കൂനിൻമേൽ കുരുപോട്ടിയിരുന്ന കോലി അത് കണ്ടതും ഒരൊറ്റ തെറി

"നിന്റെ അപ്പന്റെ വകയാണോടാ "മലരേ" (അച്ചടി ഫാഷ?), ഈ റോഡ്‌?" എന്ന്

ജീപ്പിൽ ഉണ്ടായിരുന്ന പയ്യന്മാർ ഒന്നും പറയാണ്ട് പോയി, ജസ്റ്റ്‌ ഒന്ന് ചെറഞ്ഞു. (ഇനീപ്പോ ഇവന്മാരും കോട്ടയം അച്ചടി ഫാഷ ടീംസ് ആണോ?)

കുറച്ച് കഴിഞ്ഞാണ് മനസിലായത് അവർ അവിടുത്തെ ലോകല്സ് ആണെന്നും, ആനയെ റോഡിൽ നിന്ന് ഓടിക്കാൻ വേണ്ടിയാണ് നമ്മളെ ഒവർട്ടേക്ക് ചെയ്ത് പോയതെന്നും!!

തൃപ്തി ആയി ഗോഫിയെട്ടാ തൃപ്തി ആയി

അവന്മാര് നീറ്റ് ആയിട്ട് ആ ആനയെ ഓടിച്ച് വിട്ടു, വണ്ടികൾ പതുക്കെ നീങ്ങി തുടങ്ങി.

പെട്ടെന്നാണ് നമ്മൾ അത് ശ്രദ്ധിച്ചത്, അടുത്ത ജങ്ക്ഷനിൽ ഒരു കൂട്ടം നല്ല ആരോഗ്യമുള്ള യുവാക്കൾ (ഏതായാലും കോട്ടയം ടീംസ് അല്ല) ഓരോ വണ്ടിയും ചെക്ക് ചെയ്ത് കടത്തി വിട്ടോണ്ടിരിക്കുന്നു.

അടുത്തപ്പോ കാര്യം മനസിലായി, ആ കൂട്ടം വേറെ ആരുമല്ല, നേരത്തെ ജീപ്പിൽ പോയ അതെ ടീംസ്.

കാര്യങ്ങൾ എന്താണ്ട് തീരുമാനമായി. എന്റെ ബാഗൊക്കെ സൂക്ഷിച്ച് വെച്ച്, ഞാൻ റെഡി ആയിരുന്നു. എന്ത് കൊണ്ടോ വീട്ടുകാരെ പെട്ടെന്ന് മിസ്സ്‌ ചെയ്യാൻ തുടങ്ങി. അഛാ അമ്മെ എന്നോട് ക്ഷമിക്കു, വെറും ഷോ മാത്രേ ഉള്ളു ഞാൻ ഒരു പാവമാണ്. നെഞ്ചിടി കാരണം ഷർട്ടിന്റെ ബട്ടൻസ് പൊട്ടുമെന്നാ തോന്നുന്നേ.

വണ്ടി അവന്മാരുടെ അടുത്തെത്തി. ഇതിലും ഭേദം ആനയുടെ അടുത്ത് നിറുത്തുന്നതായിരുന്നു.

വളരെ മര്യാദയോടെ ആ കൂട്ടത്തിൽ നിന്ന് ഒരു പയ്യന് വന്ന് ചോദിച്ചു "ചേട്ടാ, തന്തക്ക് വിളിച്ച ആ "പോണ്ടിച്ചേരി" മോനെ (ഹൊ കടുത്തു) മാത്രം ഇങ്ങ് ഇറക്കി വിട്ടാൽ മതി, എന്നിട്ട് നിങ്ങൾ പൊയ്ക്കോ"

അച്ചടി ഭാഷയെ കുറിച്ചു വാദിച്ചോണ്ടിരുന്ന കോലിയുടെ മുട്ടടി ഭാഷ നമ്മൾ കേള്ക്കാൻ തുടങ്ങി. ചാകും മുന്നേ ഫുൾ അടിച്ച് തീർക്കാൻ ശ്രമിക്കുന്ന ലിസയുടെ ഗുളുഗുളു ശബ്ദവും.

പെട്ടെന്നാണ് അത് സംഭവിച്ചത്, രാവണനുമായി എറ്റുമുട്ടിക്കൊണ്ടിരുന്ന അർജുനന്റെ അമ്പുകൾ തീർന്നപ്പോൾ ഭഗവാൻ ശിവൻ ഒരു ലോഡ് അമ്പുകൾ കൊടുത്ത പോലെ (എന്ത്, ഇതെപ്പാ? ഹേ ഭക്താ!! കഥയിൽ ചോദ്യമില്ല, ഏതായാലും ഏഷ്യാനെറ്റിൽ കാണിക്കുന്നേനെക്കാളും  കൊള്ളാം.) അതുവരെ ആന ഇറങ്ങിയത്‌ പോലും അറിയാതെ (വക വെയ്കാതെ) കിടന്നു ഉറങ്ങിക്കൊണ്ടിരുന്ന അനീഷേട്ടൻ (നമ്മുടെ കത്തനാർ, എന്നും നമ്മുടെ രക്ഷകൻ) ഡൈവ് ചെയ്ത് എണീറ്റ് ഒരു ടയലോഗ്

"അയ്യോ, ക്ഷമിക്കണേ, അവൻ അറിയാതെ വിളിച്ച് പോയതാണ്, ടെൻഷൻ കൊണ്ടാണ് അങ്ങനെ പറ്റി പോയത്, അവനു വേണ്ടി ഞാൻ ക്ഷമ ചോദിക്കുന്നു"

ടീംസ്: അല്ല ചേട്ടാ, ടെൻഷൻ ആയാൽ ചുമ്മാ പോകുന്നവരെ തന്തക്ക്‌ വിളിക്കുകയാണോ വേണ്ടത്? ഇവനൊക്കെ എവിടുന്ന് വരുന്നു? (കോട്ടയം കോട്ടയം)

അനീഷേട്ടൻ പിന്നെയും അതേ ടയലോഗ്
"അയ്യോ, ക്ഷമിക്കണേ, അവൻ അറിയാതെ വിളിച്ച് പോയതാണ്, ടെൻഷൻ കൊണ്ടാണ് അങ്ങനെ പറ്റി പോയത്, അവനു വേണ്ടി ഞാൻ ക്ഷമ ചോദിക്കുന്നു"

വെച്ചടി ഭാഷയിൽ രണ്ട് തെറി കൂടെ വിളിച്ചിട്ട് അവന്മാര് പോയി.

അനീഷേട്ടൻ ഉറക്കം കണ്ടിന്യു ചെയ്തു

എനിക്ക് ശ്വാസം തിരിച്ച് കിട്ടി

കിണറിന്റെ മുകളിൽ ഊഞ്ഞാൽ ആടിക്കൊണ്ടിരുന്നപ്പോൾ കയർ പൊട്ടി വീണ് സ്റ്റിക്കർ ആകാൻ ഇരുന്നവൻ, കപ്പിയിൽ കുടുങ്ങി തൂങ്ങി കിടന്ന ഒരു ഫീലിംഗ് ആയിരുന്നു കോലിയുടെ  മുഖത്ത്.

നിറഞ്ഞ്‌ ഉന്തി തള്ളിയ കണ്ണുകളുമായി "ഹവ" ആയിരുന്ന കോലിയോടു ഞാൻ ചോദിച്ചു
"ഈ അച്ചടി ഭാഷ എന്ന് പറഞ്ഞാൽ, അച്ചന് വിളിച്ച് അടി വാങ്ങാനുള്ള ഭാഷ ആണോ അളിയാ?"

ശുഭം!!